ტერეზა მეი აცხადებს, რომ ევროპელი პოლიტიკოსები ცდილობენ ბრიტანეთის დაშინებას, რათა გავლენა მოახდინონ საყოველთაო არჩევნებზე. ამის შესახებ ინფორმაციას BBC ავრცელებს.
ბრიტანეთის პრემიერმინისტრმა დედოფალთან შეხვედრის შემდეგ რეზიდენციის წინ გამართულ გამოსვლაში ბრიუსელის ბიუროკრატებს შეუტია. მისი თქმით ზოგიერთებს ბრიუსელში ბრექსიტის მოლაპარაკებების მარცხით დასრულება სურთ და უნდათ, რომ ევროპულმა პრესამ მოლაპარაკებებში ბრიტანეთის პოზიცია დაამახინჯოს.
30 აპრილს, გერმანულმა გაზეთმა Frankfurter Allgemeine Zeitung-მა საკუთარ წყაროებზე დაყრდნობით დაწერა, რომ ტერეზა მეისთან შეხვედრის შემდეგ ევროკომისიის თავმჯდომარე ჟან-კლოდ იუნკერი გერმანიის კანცლერს დაუკავშირდა და უთხრა, რომ მეისთან საუბრის შემდეგ ის ათჯერ უფრო სკეპტიკურადაა განწყობილი, ვიდრე მანამდე; რომ ბრიტანეთის პრემიერმინისტრი "დაბნეულია" და "სხვა გალაქტიკაზეა".
ტერეზა მეიმ გერმანული გაზეთის ინფორმაციას იუნკერთან რთული სადილის შესახებ "ბრიუსელის ჭორები" უწოდა და უთანხმოება უარყო.
მეიმ 8 ივნისს ქვეყნაში ვადამდელი საპარლამენტო არჩევნები დანიშნა, იმ მოტივით, რომ Brexit-ის პროცესში ბრიტანეთს მაღალი ლეგიტიმაციის მთავრობა ჰყავდეს. ამ მიზეზით დიდი ბრიტანეთის პარლამენტი დღეს დაითხოვეს. პროცედურა ვადამდელი არჩევნების დანიშვნას უკავშირდება. სწორედ ამის შესახებ მოახსენა მან დღეს დედოფალს შეხვედრისას.
ევროკავშირმა დიდ ბრიტანეთს Brexit-ის დაწყების გამო გადასახდელი თანხა 100 მილიარდი ევრო დააკისრა, რის გადახდაზეც პრემიერი უარს აცხადებს.
Comments
Post a Comment